No día de onte tivo lugar a sesión ordinaria do pleno correspondente ao mes de novembro. Como vén sendo habitual, a orde do día presentaba unicamente asuntos de trámite que describimos a seguir:
- Nomeamento da nova representante da Corporación Municipal no Consello Escolar. Foi elixida a concelleira do PSOE Concepción Campos cos votos favorables de PSOE e PP e a abstención de Veciñanza. Non asistiu á sesión o concelleiro do BNG.
- Foron rexeitadas as alegacións presentadas contra a resolución municipal que declaraba de titularidade pública o Camiño da Misa, na aldea da Louriña. Deste xeito, o expediente segue o seu trámite e dende Veciñanza agardamos unha pronta reposición da legalidade que supoña a vitoria veciñal pola que tanto están a traballar os homes e mulleres da Louriña.
- Iniciouse o expediente de contratación para as obras do vial do Polígono da Ran, en virtude da subvención do plan Depo Remse da Deputación de Pontevedra. Tal e como recordou o noso voceiro municipal, Santi Martínez, “as obras no vial do Polígono deberan terse realizado, xunto ao proxecto do viveiro de empresas de Meira, hai xa un ano coa subvención do Plan de Reequilibrio Territorial perdida polo Concello, o que nos permitiría agora aproveitar o Plan Depo Remse para acometer outros investimentos”. Con todo, o voto de Veciñanza en favor de calquera iniciativa que supoña o impulso do Polígono Industrial será sempre favorable.
Na quenda de rogos e preguntas, o noso grupo interesouse polas seguintes cuestións:
- As contas da organización das Festas Patronais 2018, que o propio Concello remitiu xa hoxe mesmo aos fogares de Cuntis
- A respecto da nosa moción aprobada o día 31 de maio para a recuperación do proxecto de Escola Infantil Pública, pregunta á que o Alcalde confirmou que non realizara ningún movemento máis que o preceptivo de dar traslado á Consellaría da aprobación da moción. Decepcionante.
- Estado da tramitación da cesión da titularidade do Centro de Saúde á Consellaría de Sanidade, ao que a Secretaria Municipal confirmou que están agardando por unha certificación do catastro para que poida volver ao Pleno.
- Recordamos que seguimos agardando polo informe solicitado o pasado mes de marzo a respecto dos pagos a empresas e medios de comunicación por parte do Concello de Cuntis, información que o Grupo de Goberno segue retendo. Os seus motivos terán.
- Manifestación pola reposición do servizo de pediatría convocada para o vindeiro mércores día 5, na que se constatou a unanimidade dos grupos municipais.