No día de onte, xoves 16 de decembro, foi aprobada na sesión ordinaria do Pleno da Corporación a Conta Xeral do exercicio 2020, unicamente cos votos do PSOE. Era o asunto máis salientable dunha orde do día que de novo volvía estar baleira, e a falta de respecto do grupo de goberno negándose a contestar, dar contas e mesmo intervir situouse á mesma lamentable altura dos nefastos resultados económicos da súa xestión.
O voceiro do grupo municipal de Veciñanza, na súa intervención (17:27 no vídeo), puxo de manifesto o descontrol da xestión económica do grupo de goberno. A acumulación de facturas sen pagar dende o ano 2017, o incumprimento do Período Medio de Pago a Provedores, a presentación das contas fóra dos prazos legais, o abuso do mecanismo de levantamento de reparos de intervención, as ordenanzas desactualizadas e a negativa a corrixir todas estas prácticas converten ao goberno municipal de Cuntis en moi irresponsable.
A sesión rematou coas preguntas de Veciñanza a respecto de varios procesos xudiciais nos que está inmerso o Concello de Cuntis e a petición ao Goberno Local para proceda a mellorar a iluminación no Campo da Feira e a Horta do Cura.
